التخلف.. من السرافيس إلى السفارات

بالإضافة لجميع مظاهر التخلف اللي بتعج عجيج ببلادنا…
بالمناسبة, بالعامية /وما بعرف إذا كمان بالفصحى/ منقول إنو “البقر بيعج عجيج“.. وبهالمناسبة كمان رح أحكيلكون هالحادثة, كان مرة فيه مُسَيئِل /تصغير مسؤول/ عم يتفقد وضع الجمعيات الفلاحية… وأثناء الخطاب /لأنو مستحيل تمرق هيك إحتفاليه بلا خطاب/ إتحمست هالجماهير وصفقت.. وفزّ شخص من ضمن هالحشود بيعتبر حالو شاعر وقال “يا ثورتنا عجّي عجيج من المحيط للخليج“… قام المسؤول إلتفت وقال لرئيس الجمعية “ما بدي شوف هالفدان مرة تانية هون“

منرجع لموضوعنا اللي ما بلش… كنا عم نقول إنو مظاهر التخلف ضاربة ببلادنا أطنابها… ونحنا كشعب عنيد, حتى لو غلط شي مظهر من مظاهر الحضارة و إجا لعنا, بتلاقينا مصرّين نعبر عن تخلفنا… شغلة مو بإيدنا… يعني, شي مرة شفتو باص مافيه مقعد مخزوق؟… أو شي مرة شفتو باص سعتو 30 نسمة مانو محشي بشي 300 نسمة؟… وخاصة عالصبح وعالضهر.. ويمكن كمان المسا…
ولحل هالمشكلة.. مدري مين إقترح ينزلوا عالبلد سيرفيسات… إنو يعني لحل مشكلة التخلف, إقترحوا حل أشد تخلف… يعني أغبى من فكرة السيرفيس بحياتي ماسمعت… والله العظيم, كا ما بتذكر السيرفيس بيضرب عندي عالعصب… إنو ليش يعني؟… كتير حلوة مناظرنا ونحنا كل ما بدنا نفوت لازم نطخي وكل ما بدنا نطلع لازم نطخي؟… وننحشر جوا السيرفيس متل السردين… إنو عالذمة, إلو علاقة بأي شكل من أشكال الحضارة؟…
وأحلى شي بتلاقي عالم بتدافع عن السيرفيس… مدري بيكون عندها سيرفيس أو عند شي حدا بيقربها… وبيجو بيقلولك إنو السرافيس حلت أزمة مواصلات… يعني شو بدي قلكون… أغبى من هيك عذر ما رح أسمع ولا أنتو حتى رح تسمعو… بس هالشغلة مو غريبة… شعب متخلف هالتخلف كلو, أفكارو رح تكون حتماً متخلفة…
إنو يا الله… هلق نحنا البلد الوحيد اللي عندو زحمة يعني؟… إنو كل مدن العالم تعدادها لا يتجاوز الـ 10 أشخاص ونحنا الوحيدين اللي عنا الملايين؟… لك أكبر مدينة عنا ما بتطلع حيّ بغير مدن ومع ذلك ما بتلاقي عندين إختراع السيرفيس… فيه زحمة وفيه مشاكل مواصلات بس ولا واحد عندين خطر عبالو هالـ… مدري شو بدي سميه…
وع سيرة الإختراعات اللي ننفرد فيها… نحنا الوحيدين بالعالم أجمع اللي منطلع بأفكار تذلّ المواطن… ومو بس هيك… صرنا نأثر سلبا عالأجانب اللي عنا كمان… لأنو اللي بيعيش بالإسطبل 40 يوم بيـ أسطبل متلو…
مثلا… هداك النهار بدي إحكي مع السفارة الألمانية بدمشق, ردو عليي وقالولي “ما منعطيك موعد إلا إذا حكيت معنا بإستخدام بطاقة سوا ذات الـ 400 ليرة“… بتصدقو بالله… لو أي سفارة بألمانيا عملت هيك, كانو تقدمو للمحاكمة… بأحسن الأحوال كانو تشرشحو إعلامياً…
الردود
1.
بخصوص سفارة ألمانيا، عم تمزح ولا عم تحكي جد؟ يعني ليش؟ ماعطوك مبرر؟
عجيب!
رد
*
الله وكيلك ما عم ذل عليك بحرف…
إذا دقيت عالأرقام الموجودة بالمفكرات أو عالأنترنت بيردو عليك.. بس إذا بدك موعد من السفارة بيقلولك “ما منعطيك موعد إلا إذا حكيت معنا ببطاقة سوا…”
وبطاقة سوا المخصصة للإتصال بالسفارة تباع حصرا في الشام.. يعني إذا واحد بطرطوس متل حكايتي أو باللادقية أو مثلا بالرقة أو بالحسكة.. وما عندو حدا بالشام يشتريلو هالبطافة, لازم يطرقا مشوار للشام كرمال يحكي مع فخامة هالموظفين بالسفارة…. لك عالذمة…. فيه أجحش من هيك شعب؟!!!
2.
كلمة تخلف حلوة ولازم نتغزل فيها متل هدول الشعراء اللي بيتغزلوا بالشام!! في أبشع من الشام!! يعني الفوضى والفشكلة والخربطة والعالم الفايتة بالحيط وبناء بيهوي وبشاعة قاسيون الاصلع والمزوع بالابنية اللي رح تعمل شي كارية شي يوم بانهيارها وكل هادا جمال
لأ واسا محطات الراديو تبعتنا بتحطلك “حلوة يا بلدي!!”
يعني اذا الواحد بشع وفيه مليون علة وندبة وأصلع وأعور بيقول عن حالو حلو!
لا تحكي عالتخلف….لأنو هيدا جزء من الحلاوة
رد
هههههه…
يا أخي الشام بشعبها… تعا قيمني بقا
نورت صديقي كنان
3.
غريب خيي ابو السمر … شكلك طلعت بالسرفيس و نزلك عند السفارة سقط لقط …. /مقوله شاميههه /
رد
مستحيل يا رجل…
شو عرفك… أسا اليوم عصبوني السفارة أكتر الله وكيلك
نورت خيي علاء
4.
السلام عليكم صديقي 🙂 احسنت التدوين , ذكرتني هذه التدوينة باحد تدويناتي القديمة “عن المكاري سنتحدث” http://tinyurl.com/y8m6edz 🙂 على كل حال انا اقوم حاليا بجمع ايميلات المدونين العرب , اذا اححت تستطيع الان ان ترسل لي ايميلك وايملات الدونين الذين تعرفهم طبعا بعد موافقتك وموافقتهم
تقبل مروري
رد
بس تكتمل القائمة ببعتلك ياها
نورت صديقي خالد
5.
حلوة كتير ومعك حق لحد كبير. نحنا شعب منكره الحضارة ومنرفض التطور للأسف والدليل هو كل مؤسساتنا ودوائرنا الحكومية وكل أمور حياتنا اليومية اللي ماشية عالتوكل.
رد
لك آخ….
شو ما حكينا ما منوفي هالشعب حقو
وفوق حقو دقو
نورت صديقي فادي

http://dandanat.wordpress.com/