دردشــــة جارات بالشام
رفيق شامي
مسلسل بألف حلقة وحلقة
مهداة كلها
بالجملة والمفرق
إلى من أضحك الجرح
محمــد الماغوط
الأشخاص والظروف
الجارات الحميمات أم علي وعفيفة والراوية أم جورج
يتكلمن دون رقيب وبشعورمن الطمأنينة
في عمق الدار فباب البيت مغلق.
وفي هذه الظروف فقط يسمي الدمشقيون
الأشخاص بأسمائهم.
الحلقة الأولى
وين الضو بآخر هالسرداب؟
ما حدى عم يحرك.
الناس ميتة رعبة
وبتموت بالنهار مية مرة
عم تركض ورا الرغيف،
والرغيـــف
صار بطل ركض.
قال أميركا بدها البلد،
ما عدى الجولان
لأنه هذا صارمن 49 سنة إلا كم يوم
بعب إسرائيل.
أميركا بدها
تاكل الأخضر واليابس،
وقال مشان يغلبوها، جمدوا الناس
حطوهم بثلاجة
الحبوس والخوف،
لأنهم ما بدهم يزعجوا الشعب
بهيك معارك صغيرة،
هني لحالهم،
قبيلـــة واحدة،
وكم فلعوص لاحقينها
بيقدروا يركعوا أميركا،
مثل ما نجح صدام
بأم المعارك،
الله يلحقهم فيه.
أهلاً أم علي!!
صباح الفل عفوفة!!
القهوه خلصت جايي بس دقيقة.
مسكينة أم علي،
نص عميا بلا كذلك.
مابتحب التلفزيون،
عندي الله الوكيل شغال
ليل نهار.
بدي إنسى
بدي إنسى إبن عمي نبيل
اللي أخدوه وحرقوا قلبي
للمرة الثانية،
بالمرة الأولانية
أخدته القبيلة.
ما حقلي إتجوزه،
بعد ما دقت حلاوته
وأنا صغيرة
وكنا نحلم أنه ما نكبر،
أنه نضل ولاد صغار،
كانت فيروز تغني لنا:
“بيسألونا ليش ما كبرتوا؟
بنقول لهم نسينا”.
أمي ضحكت علي،
قالت كبري عقلك يابنتي،
فيروزغنية،
والجوازة حياة.
كانت أمي،
الله يرحمها،
كل بلعة صرماية،
بتسميها كبر عقل.
سرقوا نبيل مني،
عطوه بنت عمه.
إفرحي!!!
وإشكري ربك!
قالت لي أختي قبل يومين،
كأنها حزرت،
أنه من يوم ما خطفته
المباحث
سكن قلبي وعقلي
من جديد.
قالت إفرحي
أبو جورج جوزك
فهمان عقله كبير،
مابيتدخل بالسياسة.
نبيل طول عمره
حشري.
ولسانه طويل.
أبو جورج،
أي
أبو جورج.
لو أختي عاشت يومين معه،
لصارت بالعصفورية.
كل شي فيه قصير
وصغير:
لسانه،
قلبه
وإيده
وكل شي
بس بطنه كبير.
وعقل؟
الجبن بيقرب العقل،
بس مو هوه بذاته.
وأختي ورثت عن أمي
طابق بالمهاجرين
والخربطة،
بين العقل وقرايبينه.
إطفوا التلفزيون
قالت أم علي.
التلفزيون بيفضي المخ.
بعد ما مات جوزها
باعته،
عملت بحقه مكدوس
وبعتتهم لعلي.
وقالت
كان المرحوم أبو علي
يقول،
هدولي مو ضيوف،
يللي بيجوا وبينسطلوا
بالتلفزيون.
لا حركة ولا بركــة
هدولي زوار
من العلم للعلم.
بس هو كان يقعد معاهم
قال مسايرة،
وكان يضحك معهم
كمان مسايرة،
وأنا مثل مكوك الحايك
شي ليموناضة، شي قهوة.
ودعه وبوسه إبني علي
على التلفون.
وبكي المرحوم بعدها ليلتين
ومات.
علي – يقبرني – عايش بلندن.
إطفي هالتلفزيون،
لنحكي كلمتين
لنسمعلنا سيرة.
علي قاللي،
منو قادر يجي عالجنازة
لأنه بيحب الشام.
ما نمت الليل
حتى فهمتها.
مين مجعوص مقابيل المذيع دخلك؟
سألت أم علي.
صابر فلحوط؟
الجارة بتسمي كل واحد
عم يصرخ ويشوبر:
صابر فلحوط.
من يوم ما زعق وشوبر
بحرب الست إيام.
هيي إسرائيل سمتها ست إيام
تقبريني،
لحتى ما ناخذ على خاطرنا.
قالت عفيفة وقتها
بلسانها الأحد من سكينة.
الحقيقة
الحرب خلصت
بعد ست ساعات.
إهدري يا أمتي!!!
صرخ صابر فلحوط.
درجة الحرارة على القنال
أذاعها راديو إسرائيل.
والميغ تتحدى القدر!!!
لأ هاي مو من صابر،
هي من فهد بلان.
درجة الحرارة في القنيطرة.
وأملأي الدنيا حمم!!!
أي حمة تجيك.
دعت أم علي وقتها
على صابرفلحوط
لأنها كانت خايفة على
إبنها علي،
مثل كل أم.
بس عند مرسيل خليفة،
بتفرح الأمهات،
إذا قتلوا أولادها.
قال هيك الغنية الملتزمة
بيلزمه عليها كفين،
من أمه.
صفقوله ولاد أبوهم.
يللي ما عندهم نتفة محبة للأم.
ولا فهم لقلبها.
ست ساعات وخلصت الحرب
بس ما لحقوا اليهود،
يظبطوا الحدود.
إلا بعد
ست أيام.
ثم أخذوا دوش
وطلعوا للصحافة وقالوا
اليوم خلصت الحرب.
والعرب عادوا وراهم متل الببغاء:
اليوم خلصت الحرب.
بس صابر فلحوط ضله يزعق،
لحتى صار معه فتاق.
علي رجع باليوم السابع
قال ما كان في حرب،
كله فيلم.
وفريد الأطرش غنالكم ياكبدي؟
سألته أمه،
ضحك علي كثير واتشردق.
قلت وقتها،
الله يسترنا من هالضحكة.
ليش بقى يسترنا؟
شو الضحك فضيحة؟
نهرتني أم علي.
أمة، أمة، أمة!!!
شو هالأمة اللي
بتبطحها دولة صغيرة؟
سكانها كلهم عرج وعور
وما بيطلعو قد نص الشام.
قال علي
يمكن كذب، نحنا مو كثار هالقد.
يمكن كمان هي دعاية
من أحمد سعيد
أو صابر فلحوط.
بعد يومين أخدوا علي
دغري على تدمر.
ومن يومها تهمت أم علي
صابر فلحوط،
إنه دز على علي.
حتى بعد ماطلع من السجن وهرب
لبلاد بره،
ضل صابر فلحوط السبب.
صارت تعمل دعاوي،
ما بتذكر منها إلا أنها
كلها على وزن فلحوط.
بس لا،
هادا مو صابرفلحوط،
إقري شو كتبوا تحت صورته.
وين؟
إختفت ما لحقت إقراها،
وشو قريتي؟
الدكتور نايف … وما بعرف شو،
ليش إختي هذا برنامج طبي؟
لأ هو هيك، إسمه هيك.
بس هادا مو دكتورعن صحيح
هادا سياسي.
وشو دخل الدكتور بالسياسة؟
هادا آخر زمن.
الدكاترة مابيفهموا بالطب،
بيصيروا بيحكوا بالسياسة.
على شوي كان الدكتور روحني،
قال دكتور قال.
الله لا يوفقه.
عطاني أدوية معفنة.
جابها وقتها
إبن طلاس وإبنه للخدام.
أي خدام؟
النووي!
إسمعي لك أختي،
شو عم يقول هدا الدكتور.
بده يحرر فلسطين.
بالتلفزيون؟
سألت عفيفة.
بدو يهزم ويكسر ويطربش
هدا مو دكتور.
بس تاري كتروا الدكاترة.
من يومين
قاللي شوفير تكسي
إنه دكتور.
قلت له مو باين عليك يا إبني
كسمك معتر مثلنا.
بس هاد بطقم أزرق مرتب،
وقاعد بالتلفزيون على كرسي
والله منظره مثل رائد فضاء.
بهدا المسلسل،
مدري شو أسمه.
ليش صاروا كلهم دكاترة؟
هلق كمان صابر فلحوط دكتور؟
أي
ورفعت الأسد دكتور
يخرب بيتو
إذا كلهم دكاترة
رفعت ما ممكن يكون دكتور
هادا اكيد دك تور
قام سموه هيك.
ولهط الأخضر واليابس
لذلك لازم يسموه لهطور.
قالت عفيفة
ليش لأ يا أختي،
مادام بهالأيام
بهجت سليمان دكتور
بالتحقيق ولا بالحقوق
لا بالتحقوق
قالت عفيفة
هذا كذب
هزت أم علي راسها
غير موافقة
إذا بالكذب
ما في مثل بثينة شعبان
علي إبنها قال لها
بيعرفها
هي وزيرة
المنفيين والمُهجَرين
أكدت أم علي
واللاجئين كمان؟
يخليها لأمها
على هالترباية
بثينة، هالحرباية
علقت عفيفة المسماوية.
كمان هي دكتورة؟
يمكن ناقلين بالفحوص من بعض
لا بس إسمعوا شوي هادا الدكتور
نايف مدري شو
بده يحارب
مين؟
أميركا وإسرائيل،
وإذا لزم الأمرالدنية كلها.
العرب بدهم دوم يحاربوا الدنية،
وهنن مو قادرين على حماتهن.
لك سمعوا شو قال:
المهم كرامــة الإنسان،
معناته هوصديق ميشيل جارنا.
أي
أكيد؟
سألت أم علي بصوت مهموم
أي.
لكن هلق بدهم يعتقلوه،
والله بيسحبوه من إجره
دغري على بيت خالته.
مثل نبيل اللي أخدوه،
لأنه قال
لاحربكم حرب،
ولا سلامكم سلام.
الله يحميه،
هذا الدكتور مبين عليه آدمي
ودرويش،
ويمكن يكون عنده مرة وولاد
الله يساعده ينفد بريشه.
طيب روقي شوي
وشو قال الدكتورعن إبني؟
لسا ما قال شي.
عم يحكي
عن حق كل بلد بالحرية.
أكيد عم يقصد لبنان،
ولي وألف ولي!!!
وقعته سوداء،
إذا فتح تمه عن لبنان.
إسمعي لك أختي،
عم يقول لكل واحد حق
يرجع لوطنه.
يرجع لوطنه؟
أكيد عم يقصد إبني،
قالت أم علي،
روقي شوي، أكيد هلق بيطالب ….
لا هذا ما بيطالب بشيء،
إلا بسترته،
قاطعتني عفيفة،
ولولا هيك ما طلعوه
يهرج بالتلفزيون،
ولتتفرج كل العالم عليه.
قالت عفيفة
والسم عم يقطر من تمها،
يا ولدي شو ظنانة.
قبل بيومين قالتلي،
هدول القاعدين عند العشيرة،
ياكلوا من تلاتين سنة،
وتحت إجريهم بالقبو،
الناس عم تتعذب وتصرخ.
ليش مابيسمعوا؟
ما سألتني الخبيثة
لتعرف الجواب،
جايبته بعبها
ضحكت ضحكة صفراوية،
وكملت
لأنه شيخ العشيرة
ذكي كثير،
بيكبر اللقمة لضيوفه،
كثير كثير
ولما هدول يفتحوا تمهم،
كثير كثير
ليبلعوا اللقمة،
بتـنسد آدانهم،
جربيها، أختي،
جربيها!!!
قالت عفيفة.
واليوم زادتها كثير،
على هدا اللي قاعد ضيف بالتلفزيون
قلتلها لفيها بقى،
شو صار الزلمة بهلوان؟
قلت لها لتستحي شوي.
عينها وقحة ما بيفوت فيها مخرز.
زعقت:
شو بهلوان؟
والله أعظم بهلوان سيرك
بيطلع مثل المكرسح إذا شاف
هالشوفات.
أنا بعرفه من أربعين سنة
دارسته وش وقفا،
لما طلب مرة من ناصر،
أنه يفلت الشيخ الضرير إمام.
قال له ناصر: سد بوزك يا نايف !!!
فسده لليوم،
مع أنه ناصر
صارت عضامه مكاحل.
عفيفة بنت حبوس
مشان هيك ما حدى تجوزها،
بيكفيني حبوستي،
ما بدي حبس مؤبد.
قالت
لسانها أعوذ بالله،
وعندها ذاكرة جمل
بس هداك شيخ، إبني موشيخ
قالت أم علي.
وجارنا ميشيل؟
العمى بقلبهم،
كيف مسيحي وشيخ؟
احتجت أم علي،
بالضرب قر جارنا جوزيف،
إنه إخوان.
أضافت عفيفة.
أكيد صابر فلحوط دزعليهم
قالت أم علي،
اللي ماسمعت بعمرها
بالشيخ إمام.
أنا عندي كاسيت منه،
هداني ياها نبيل
بيحب الشيخ كثير.
صرخت فيهم
طولوا بالكم ياجماعة
ماعدنا فهمنا شي
لأنه الدكتور
مدري شو إسمه
بلش يحكي عن الحرية
قلت هلق بده يدافع
عن المساجين بالشام.
لأنهم كلهم بيحبوا فلسطين.
نبيل والياس وميشيل فاتح وسناء ومحمود.
يارب تستره
وترجعه لعياله.
إطفي التلفزيون!!!
قالت عفيفة
بدي سولف لكم،
شو حكالي بياع البصــل
…
(قرع شديد على الباب)_________________________________يتبع __
المانيا أيار2006
بعد أيام من حملــة الإعتقالات
خاص – صفحات سورية –
الحقوق محفوظة للكاتب ولصفحات سورية
