أنا موال لهذا النظام 1

سيجد البعض في ما أكتب غباءً منقطع النظير ، أن هناك أحداً يعلن و على رأس السطح أنه موال لنظام ديكتاتوري قمعي استبدادي إلى آخر اللازمة التي يتنطح بها أتباع الثقافة الحداثوية من جماعة الديمقراطية و حقوق الإنسان ، هذا ما أنا عليه الآن ، و لا أريد أن أغش أحداً ، و الحياة موقف و انتماء ، بس شو يعني موالي ؟
قبل البدء
لكل من سيقول الله يديمك ذخراً لهذا النظام ، سأقول له شكراً سلفاً ، و لكل من سيشتمني كثر خيرك ما بتقصر ، و لكل من سيسمعني إلى الآخر لا تأكل فول الشغلة بدها مخ و الفول بسكر الدماغ على اعتبار أنو آخر منجزات الحركة التصحيحية .
قولكم في حدا عاقل في سوريا بيصدق أنو مواطن سوري بيحب الحكومة بثلاثيها المرح عطري – الدردري – الحسين ، يا عمي هدول شحدونا رغيف الخبز بسياسات اقتصادية أقل ما يقال عنها سياسة تخريبية ستقذف بالبلد إلى حافة الهاوية ، و الشعب مرتاح كتير على فكرة بهذا الملزوق بقفاه على اعتبار أن الألم يولد لذة ما بعدها لذة ، و صريخو من المتعة مو من شي تاني ، و على فكرة النكح من الدبر مو حرام ، هي فتوى من عندي شو بس شيخ الأزهر بيطلع فتاوى ، قال في موال بيلبقلها لحكومتنا حتى أنو كتار مغرمين فيها
لأجلها ملك الصين باع صينو ، أكبر رئيس بألمانيا باعصينو ، عفواً طلعت رئيسة مش رئيس ، بسيطة يحق للشاعر ما لا يحق لغيره  !
بما أني سوري و ما زلت أعيش في سوريا ، يعني أغلب ما يحدث هنا أراه بعيني و ألمسه بيدي ، فلا حاجة لي لقناة العربية لأن تعمل تقريراً مصوراً لأعرف ، أو لجمعية حقوق إنسان لتخبرني عما يحدث ، أعرف أمراً واحداً بالسياسة الداخلية عم يصير تخبيص ، و لا أعداءنا عم يعملوه ، تحت كل تتخيتة في كومة أموال منهوبة ، و تحت كل مسؤول في بير أسرار عن صفقات مشبوهة ، عم ينباع و ينشرى بالبلد على آخر مستوى ، شو راضي أنا لا و الله مش راضي ، مبارح طلع قرار أنو المدير هوي اللي بيحطلك علامة الترفيع ، يعني رقبتك صارت بأيدو ، كان يحقلك تتعالج ع حساب الدولة هلق ما بيحقلك شي ، كل مخالفة شرطة بيطلعلو عالشرطي منها نسبة و لهيك حلقت رشاوي السير ، بتعرفوا أنو حرامي المازوت صار أمين عفواً محافظ ، فرحوا الشباب عنا وزعوا شعيبيات لأنو ابن العشيرة …
أنا موالي لا و الله مش موالي ، بس الخشبة بعيني ، و البعض عم ياخد جرحي ليتاجر فيه برا ، هدول عم يتاجروا جوا و هدوليك عم يتاجروا برا ، و أنا عم باكل عصي جوا و برا …

يتبع
http://nawarshash.com/